Psalm 12 Tamil HEBREW - தமிழ் வேதாகமம்

அட்டவணை

Original verses for சங்கீதம் 12

לַמְנַצֵּ֥חַ עַֽל הַשְּׁמִינִ֗ית מִזְמ֥וֹר לְדָוִֽד׃

הוֹשִׁ֣יעָה יְ֭הוָה כִּי גָמַ֣ר חָסִ֑יד כִּי פַ֥סּוּ אֱ֝מוּנִ֗ים מִבְּנֵ֥י אָדָֽם׃

שָׁ֤וְא׀יְֽדַבְּרוּ֮אִ֤ישׁ אֶת רֵ֫עֵ֥הוּ שְׂפַ֥ת חֲלָק֑וֹת בְּלֵ֖ב וָלֵ֣ב יְדַבֵּֽרוּ׃

יַכְרֵ֣ת יְ֭הוָה כָּל שִׂפְתֵ֣י חֲלָק֑וֹת לָ֝שׁ֗וֹן מְדַבֶּ֥רֶת גְּדֹלֽוֹת׃

אֲשֶׁ֤ר אָֽמְר֨וּ׀לִלְשֹׁנֵ֣נוּ נַ֭גְבִּיר שְׂפָתֵ֣ינוּ אִתָּ֑נוּ מִ֖י אָד֣וֹן לָֽנוּ׃

מִשֹּׁ֥ד עֲנִיִּים֮מֵאֶנְקַ֪ת אֶבְי֫וֹנִ֥ים עַתָּ֣ה אָ֭קוּם יֹאמַ֣ר יְהוָ֑ה אָשִׁ֥ית בְּ֝יֵ֗שַׁע יָפִ֥יחַֽ לֽוֹ׃

אִֽמֲר֣וֹת יְהוָה֮אֲמָר֪וֹת טְהֹ֫ר֥וֹת כֶּ֣סֶף צָ֭רוּף בַּעֲלִ֣יל לָאָ֑רֶץ מְ֝זֻקָּ֗ק שִׁבְעָתָֽיִם׃

אַתָּֽה יְהוָ֥ה תִּשְׁמְרֵ֑ם תִּצְּרֶ֓נּוּ׀מִן הַדּ֖וֹר ז֣וּ לְעוֹלָֽם׃

סָבִ֗יב רְשָׁעִ֥ים יִתְהַלָּכ֑וּן כְּרֻ֥ם זֻ֝לּ֗וּת לִבְנֵ֥י אָדָֽם׃